နိုဝင်ဘာလဆန်းမှ စတင်ကာ အိန္ဒိယမှ ကွမ်းသီးဝယ်ယူမှု ရပ်ဆိုင်းထားသောကြောင့် ကွမ်းသီးကုန်သည်များ အခက်ကြုံနေ
မြန်မာ - အိန္ဒိယနယ်စပ် ရောင်းဝယ်ရေးမှာ ဒုတိယ အကြီးမားဆုံး အရောင်းအဝယ်ဖြစ်တဲ့ ရိဒ်နယ်စပ်မှာ ယခု နိုဝင်ဘာလဆန်းကနေ စတင်ပြီး အိန္ဒိယနိုင်ငံ ကုန်သည်တွေက ကွမ်းသီးဝယ်ယူမှု ရပ်ဆိုင်း ထားတာတွေကြောင့် မြန်မာနိုင်ငံဘက်က ကွမ်းသီးကုန်သည်တွေ အခက်ကြုံနေရတဲ့အကြောင်း ကွမ်းသီးကုန်သည်တွေဆီကနေ သိရပါတယ်။
''မြန်မာ - အိန္ဒိယနယ်စပ် တစ်ဖက်နိုင်ငံ နယ်စပ်အကောက်ခွန်က ကွမ်းသီး တင်သွင်းမှုကို ပိတ်ထားတယ်။ ကွမ်းသီးအရောင်းအဝယ် နည်းပါးခဲ့တာကတော့ ပြီးခဲ့တဲ့ အောက်တိုဘာလကတည်းက ဖြစ်ပါတယ်။ အိန္ဒိယပြည်မထဲမှာ မြန်မာနိုင်ငံက တင်သွင်းလိုက်တဲ့ ကွမ်းသီးကို တရားဝင် သွားခွင့်မပြုဘဲ နားလည်မှုနဲ့ ပြည်မကို တင်ပို့နေရတယ်လို့ ဆိုပါတယ်။ ပြည်မထဲမှာ မကြာခဏဖမ်းဆီး အရေးယူမှုတွေ မကြာခဏ ဖြစ်လာတော့ နယ်စပ်က ပိတ်ထားတာလို့ ပြောပါတယ်'' လို့ ကွမ်းသီးကုန်သည် ဦးထွန်းမောင်က ပြောပါတယ်။
မြန်မာနိုင်ငံက ကွမ်းသီးကုန်သည်တွေအနေနဲ့ နယ်စပ် ကွမ်းသီး ရောင်းဝယ်မှုမှာ တမူး နယ်စပ်ဘက်ကနေ တင်ပို့ရောင်းချမှု ရှိသကဲ့သို့ ယခုနှစ်တွေမှာတော့ ရိဒ်နယ်စပ်မှာ ကွမ်းသီးအများဆုံး တင်ပို့ရောင်းချပြီး ရိဒ်နယ်စပ် ကုန်သွယ်ရေးစခန်းမှ တရားဝင် ထုတ်ပြန်ထားတဲ့ သတင်းတွေအရ အောက်တိုဘာလအတွင်းမှာ နယ်စပ်ကွမ်းသီး တင်ပို့ရောင်းချမှုက အရင်နှစ်တွေကထက် ကျဆင်းနေတာဖြစ်ပါတယ်။ အောက်တိုဘာလ တစ်လအတွင်း အမေရိကန်ဒေါ်လာ ၀.ဝ၉၂ သန်း တန်ဖိုးရှိ ကွမ်းသီး ၁၁၃ တန်သာ တင်ပို့ရောင်းချနိုင်ခဲ့တာ ဖြစ်ပါတယ်။
''ကျွန်တော်တို့ အိန္ဒိယဘက်မှာက မြန်မာဘက်က ဝယ်ယူတဲ့ ကွမ်းသီးကို တရားဝင် သယ်လို့မရပါဘူး။ တရားဝင် အခွန်ဆောင် သယ်ယူမယ်ဆိုရင်လည်း ကွမ်းသီး တစ်ကီလိုဂရမ်ကို အိန္ဒိယရူပီးငွေ ၁ဝဝ ပေးဆောင်ရပါတယ်။ အခု အိန္ဒိယ ကွမ်းသီးကုန်သည် အများစုက တရားမဝင် လမ်းကြောင်းကနေ တင်ပို့ ရောင်းဝယ်နေကြတာဖြစ်တဲ့အတွက် ကွမ်းသီး အရောင်းအဝယ်ဈေးကွက် မငြိမ်သက်မှု ဖြစ်နေတာပါ'' လို့ အိန္ဒိယနိုင်ငံက ကုန်သည် ဦးလျှံဇမုန်က ပြောပါတယ်။
မြန်မာ - အိန္ဒိယနယ်စပ်ရိဒ်နဲ့ တမူးနယ်စပ်ဘက်မှာ မြန်မာနိုင်ငံဘက်ကနေ တင်ပို့တဲ့ ကွမ်းသီး အလုံးလိုက်ကို တစ်ကီလိုဂရမ်ကို ရူပီးငွေ ၂ဝဝ နဲ့ အရောင်းအဝယ်ဖြစ်နေပြီး ကွမ်းသီးခြင်း တစ်ကီလိုဂရမ်ကိုဆိုရင်တော့ အိန္ဒိယရူပီးငွေ ၁၇ဝ ဝန်းကျင်ဈေး ရှိပါတယ်။
Source: Democracy today